Mongolian Code 1695

nigen jüyil. γadan-a öggügsen ulus-un güngjü, čin-vang-un yeke qatun-ača doruγsi, güng-ün ökin gege, gung-üd-ün gergei-ten-eče degegsi čin-vang-ača doruγsi, terigün jerge-yin tayiji tabunung ba, bey-e jidküjü oluγsan jingken-ü qafan-tan-ača degegsi önggerebesü čaγalsu qoni ariki ögčü. [81a] kesig kürtegül-ün takiqui-dur dotuγ-a-du yamun-ača manju mongγol-un ügeber takiqu bičig bičijü, törü-yin yabudal-un yamun, γadaγ-a-du mongγol-un torü-yi jasaqu yabudal-un yamun-u tüsimed-i jokis-i inu üjejü jaruju bičig daγudan , ariki dusaγaju takimu kemejüküi. ilγabasu jasaγ-un čin-vang egebesü. deger-e-eče kesig kürtegül-ün nigen biraγu, naiman qoni, ariki yisün nongq-a čaγalsu nigen tümen qaγudasun dotuγ-a-du yamun-ača manju mongγol-un ügeber takiqu bičig, dotuγ-a-du sayid nigen. [81b] degedü-yin kiy-a-nar, törü-yin yabudal-un yamun γadaγ-a-du mongγol-un törü-yi jasaqu yabudal-un yamun-u erkin tüsimel bolbasu, ded tüsimel bolbasu nijeged ilaγaγči tüsimel bolbasu, tusalaγči tüsimel bolbaču nijeged jarumu. törü-yin giyün-vang-dur nigen biraγu jirγuγan qoni, ariki doluγan nongqa, čaγalsu naiman mingγan qaγudasun, dotuγ-a-du yamun-ača manju mongγol-un ügeber takiqu [82a] bičig degedü-yin kiy-a nigen törü-yin yabudal-un yamun, γadaγ-a-du mongγol-un törü-yi jasaqu yabudal-un yamun-u ded tüsimel bolbaču nige, ilγaγči tüsimel bolbasu, tusalaγči tüsimel bolbaču nijeged jarumu. törü-yin noyan-dur nigen biraγu, dörben qoni, ariki tabun nongqa, čaγalsu jirγuγan mingγan qaγudasun, qusiγun-u tayiji-dur tabun [82b] qoni, ariki tabun nongq-a čaγalsu tabun mingγan qaγudasun, ulus-un tüsiy-e güng-dür dörben qoni, ariki dörben nongq-a, čaγalsu dörben mingγan qaγudasun, ulus-un-dur tusalaγci güng-dür dörben qoni, ariki dörben nongq-a, čaγalsu γurban mingγan qaγudasun, dotuγ-a-du yamun-ača manju mongγol-un ügeber takiqu bičig, degedü-yin kiy-a nigen törü-yin yabudal-un yamun, γadaγ-a-du mongγol-un [83a] törü-yi jasaqu yabudal-un yamun-u ilγaγči tüsimel bolbaču, tusalaγči tüsimel bolbaču nijeged, terigün jerge-yin tayiji, tabunung-dur γurban qoni, ariki γurban nongq-a, caγalsu qoyar mingγan qaγudasun, bey-e jidküjü oluγsan jingkin-ü qafan-dur qoyar qoni, ariki qoyar nongq-a, čaγalsu nigen mingγan qaγudasun, dotuγa-du yamun-ača manju mongγol-un ügeber takiqu bičig, törü-yin yabudal-un yamun, γadaγ-a-du mongγol-un törü-yi jasaqu yabudal-un yamun-u tüsimed-i jokis-i inu üjejü jarumu. basa čin-vang-ača doraγsi, güng-üd-eče degegsi küčün tusa kijü güng čola-yi [83b] bayiγuluγsan ulus-tur temdeglejü, čilaγun bai bayiγulqu ba, ketürkey-e qayiralaju ilegüü kesig kürtegülkü kiged, sayid kiy-a-nar-i nemejü jaruqu anu degedü-yin joriγ, γadaγ-a öggügsen ulus-un günjü egebesü deger-e-eče kesig kürtegül-ün nigen biraγu, naiman qoni, ariki yisün nongq-a čaγalsu nigen tümen qaγudasun, dotuγ-a-du yamun-ača manju mongγol-un ügeber takiqu bičig, dotuγ-a-du sayid nigen, kiy-a-nar nigen, törü-yin yabudal-un yamun, γadaγ-a-du mongγol-un törü-yi jasaqu yabudal-un yamun-u erkin tüsimel bolbaču, ded [84a] tüsimel bolbasu nige, ilγaγči tüsimel bolbasu, tusalaγči tüsimel bolbasu nijeged jarumu. jasaγ-un güngjü, jasaγ-un gege, čin-vang-un yeke qatun-dur nigen biraγu jirγuγan qoni, ariki doluγan nongq-a čaγalsu naiman mingγan qaγudasun, dotuγ-a-du yamun-ača manju mongγol-un ügeber takiqu bičig, degedü-yin kiy-a-nar, törü-yin yabudal-un yamun, γadaγ-a-du mongγol-un törü-yi jasaqu yabudal-un yamun-u ded tüsimel bolbaču nigen, ilγaγči tüsimel bolbaču, tusalaγči tüsimel bolbaču nijeged jarumu. törü-yin giyün-vang-un ökin törü-yin gege [84b] törü-yin giyün vang-un yeke qatun-dur tabun qoni, ariki tabun nongq-a, čaγalsu jirγuγan mingγan qaγudasun, dotuγ-a-du yamun-ača manju mongγol-un ügeber takiqu bičig, törü-yin yabudal-un yamun, γadaγ-a-du mongγol-un törü-yin jasaqu yabudal-un yamun-u tüsimed-i jokis-i inu üjejü jarumu. törü-yin noyan-u ökin törü-yin gege, noyan-u qatun-dur γurban qoni. ariki γurban nongq-a, čaγalsu tabun mingγan qaγudasun, qusiγun-u gege, qusiγun-u tayiji-yin qatun-dur qoyar qoni, ariki qoyar nongq-a, čaγalsu dörben mingγan qaγudasun, güng-ün ökin gege, güng-üd-ün [85a] gergei-ten-dür qoyar qoni, ariki qoyar nongq-a, čaγalsu γurban mingγan qaγudasun öggümü. törü-yin noyan-u ökin, törü-yin gege, noyan-u qatun-ača doruγsi güng-ün ökin gege, gung-üd-ün gergei-ten-eče degegsi takiqu bičig ögkü ügei. törü-yin yabudal yamun, γadaγ-a-du mongγol-un törü-yi jasaqu yabudal-un yamun-u tüsimed-i jokis-i inu üjejü jarumu. ulus-un güngjü-eče doruγsi gege-ner qatud-dur ene toγtayaγsan-ača öber-e ketürkey-e qayiralaju ilegüü. [85b] kesig kürtegülkü ba sayid kiy-a-nar-i nemejü jaruqu anu degedü-yin joriγ, ene kesig kürtegül-ün sayid jaruju takiqu bičig-i kegür-ün dergede abačiqui-dur, öber-ün aq-a-nar degüner qariy-a-tu tüsimed-i abču kegür-eče nigen ber-a-yin γajar-un üjügür-tür uγtuju sögödčü önggeregülüged, qoyin-a-ača daγaju orumu. takiqu bičig daγudaqu ba, ariki dusaγaqui-dur, čuγlaγsan olan bügüde čöm sögöddümü. bičig daγudaju ariki dusaγaju baraγsan-u qoyin-a bosamu [86a] takiqu yosu bariγsan-u qoyin-a. jarliγ-iyar oduγsan sayid-i toγtaγsan γajar-tur üdeged, qoyisi irejü kesig kürtegülügsen yosuγar degedü-yin jüg γurbata sögödčü yisün-te mörgümü kemen ayiladqaju toγtaγajuqui.