Mongolian Code 1695

[41a] nigen jüyil. aliba kümün, kümün-ü mori, temege, üker, qoni ene dörben qusiγu mal-i nigen kümün qulaγbasu, ejen boγul-i ilγal ügei köbčidejü alamu. qoyar kümün qulaγabasu nigen-i inu alamu. γurban kümün qulaγbasu qoyar-i inu alamu. olan bülüglejü qulaγabasu terigülegsen qoyar kümün-i alamu. busud-i ded bolγaju jaγuγad tasiγur jančiju γurbaγad yisün boda abumu kemejüküi. ijaγur-ača jasaγ-iyar bolγaγsan qulaγayiči-yin em-e keüked, ger mal, ded qulaγayiči-yin yal-a-yin mal-i čöm jerge-yin kümün-dür ögčüküi. tüsimel manu kelelčegsen anu. [41b] γadaγ-a-du mongγol-ud mal-dur itegejü aju törümü. qasiy-a küriy-e ügei-yin tula, ijaγur-ača qulaγayiči-yin čingdalan jasaγ-iyar bolaγaγsan qulaγayiči-yin em-e keüked ger mal-i keyiskejü jerge-yin kümün-dür öggügseger boluγsan-u tula, edüge mön-kü jasaγ-iyar bolγaγaγsan qulaγayiči-yin em-e keüked ger mal, ded qulaγayiči-yin yal-a-yin mal-i čöm jerge-yin kümün-dür öggüy-e kemen kelelčejüküi. engke amuγulang-un arban dörbedüger on, namur-un dumdatu sar-a-dur toγtaγaγsan anu, mori, temege, üker, qoni ene dörben qusiγu mal-i [42a] qulaγabasu, tus mal-un ejen bariqu ba, köndelen kümün baribasu mön-kü urida-yin yosuγar qulaγayiči-yi jasaγ-iyar bolγaju em-e keüked ger mal-i keyiskejü mal-un ejen-dür öggüy-e. qulaγayiči-yin yal-a dürbelkü metü bolbasu siq-a. siqan-dur orubasu uridu yosuγar yal-a ügei baray-a. siqan-dur ese orubasu qulaγayiči-yi mön-kü jasaγ-iyar bolγay-a. egün-ü em-e keüked-i boγul ögkü-yi uγurču, bui büküi mal basa qariy-a-tu ejed-eče nigen yisün boda abču mal-un ejen-dür öggy-e öber öber-ün qariy-a-tu [42b] ejed qulaγayiči-yi γarγaγčid bolbasu, qulaγayiči-yi mön-kü jasaγ-iyar bolγaju em-e keüked boγul keyiskekü-yi uγurču, bui büküi mal-i abču mal-un ejen-dür öggüy-e kemejüküi.