Mongolian Code 1695

Article 75

nigen jüyil. noyad-un kegür-i köndebesü čabčiju alamu. qaraču kümün-ü yasun-i aγudalabasu nigen yisün boda abumu. önggeregsen kümün-dür [38b] obuγ-a bosqasuγai kemegčid bui bolbasu bosqatuγai. mongγol-un yosubar niγuju talbisuγai kemegčid bolbasu öber öber-ün ejen-ü dura medetügei. ükügsen kümün-dür mori buu ala. jodur buu qadqu. γool-un olum-dur ba, aγula-yin kümün-dür kib jeleme tormosu buu uyaγtun. jasaγ-ača eteged yabuγčid-i ken üjebesü üjegsen kümün tabun boda ab kemejüküi. önggeregsen kümün-ü obuγ-a aγudalaγsan kümün-ü yal-a-yin kündü könggen-i ilγaju ese toγtaγajuqui. tüsimel man-u kelelčegsen anu. tüsimel ba, qaraču kümün vang noyad qusiyu-nu tayiji [ 39a ] güng-üd-ün kegür-i köndebesü, terigülegsen nigen kümün-i čabčiju alaγad em-e keüked-i ger mal-i keyiskejü, busud-i jaγuγad tasiγur jančiju γurbaγad yisün boda abču čöm kegür-ün ejen-dür öggüy-e. qaraču kümün tayiji tabunung-ud-un kegür-i aγudalabasu terigülegsen nigen kümün-i köbčidejü alay-a busud-i ded bolγaju jaγuγad tasiγur jančiju, qosiyaγad yisün boda abču kegür-ün ejen-dür öggüy-e. tüsimed-ün kegür-i aγudalabasu terigülegsen nigen kümün-i jaγun tasiγur jančiju, yal-a γurban yisün boda, busud-i jaγuγad tasiγur jančiju, nijeged [39b] yisün boda abču kegür-ün ejen-dür öggüy-e. qaraču kümün-ü kegür-i aγudalabasu terigülegsen nigen kümün-i jaγun tasiγur jančiju, nigen yisün boda, busud-i nayaγad tasiγur jančiju, nijeged yisün boda- yi abču kegür-ün ejen-dür öggüy-e.

[view entire text

Table of content

Index

personname

geoname