Mongolian Code 1789

tngri-yin tedkügsen-ü döčin jirγuduγar on. qabur-un segül sar-a-yin sin-e-yin γurban-a jarliγ baγulγaγsan anu. aliba dotuγadu jasaγ-un vang, güng, tayijinar-un doturaki ijаγur-аčа tayizu, tayizüng tulγur törü negegsen čaγ-tur aliba urida öber öber-ün qariγ-a-tu albatu nar-i abču čing ünen-iyer oruju ireged, γajar γajar-un čirig-ün dayin-dur masi yekede jidkügsen-ü tula teyin-kü γabiy-a jidkülge-yi ilerkeyilejü ilγan salγaju vang, güng, jasaγ ergümjileged čöm üy-e ularin tasural ügei jalγamjilaγulumui kemekü üsüg-i öber öber-ün γabiy-a jidkülge-yi inu üjejü ilγan, salγaju terigün jerge, qoyaduγar jerge tayiji-yin jerge šangnaγsan bolbaču ijaγur-ača oγuγata üy-e ularin tasural ügei jalγamjilaγulqu üsüg ügei-yin tula teyin-kü ene jerge-yin tayijinar orun γaruγad daraγ-a daraγ-a-bar ür-e köbegüd-tür jalγamjilaγulqui-dur qariy-a-tu yabudal-un yamun-ača saγar ügei qauli yosuγar jerge baγaraγulqui-yi γuyun ayiladqamui. teden-ü uγ ündüsün ijaγur-un jidkülge-yi bi čöm labtalan medeküi-yin tula udaγ-a büri kesig kürtegejüöber öber-ün ijaγur-un jerge jalγamjilaγuluγsaγar iregsen bolbaču yerü edür udaγad teden-ü tulγur oruju iregsen γabiy-a jidkülge-yi ese bögesü temdeglen ülü čidaqui-dur yabudal-un yamun-u qauli yosuγar jerge baγuraγulju sidkegseger tus tus-taγan ulus törü-yin kesig-i olju kürtejü ülü čidaqui-dur kürgekü bolbasu üneker minu mongγol boγulčud-i ab adali oldun örüsiyekü tuyil-un sanaγan-dur ülü neyilekü bolumui. ene jerge-yin tayijinar, kedüi čöm öčüken tayiji bolbaču erkebsi tulγur oruju iregsen γabiy-a jidkülge bögüi qaγučin tüsimel mön bolai. ijaγur-ača teden-dür šangnaγsan terigün jerge, qoyaduγar jerge tayijinar-un jerge-yi čöm kesig kürtegejü üy-e ularin tasural ügei jalγamjilaγuluγtun, γaγčakü egün-ü doturaki basakü engke amuγulang on-ača inaγsi eng-ün jerge jidküged kesig kürtegejü jerge šangnaγsad bui. mön-kü tulγur oruju iregsen γabiy-a jidkülge büküi tayijinar-luγ-a adali üy-e ularin tasural ügei jalγamjilaγulqu bolbasu qarinču tulγur törü negegsen čaγ-tur oruju iregsen tayijinar-un ijaγur-un jidkügsen γabiy-a-yi ilerkeyilen čidaqu ügei. egün-i γadaγadu mongγol-un törü-yi jasaqu yabudal-un yamun-dur tusiyan ögčü egüeče uruγsi tulγur oruju iregsen γabiy-a jidkülge büküi tayijinar-tur ijaγur-un šangnaγsan jerge-yi jalγamjilaγulun sidkeküi-dür ey-e-ber jasaγči on-ača činaγsi tulγur törü negegsen čaγ-tur čirig-ün dayin-dur jidküged jerge olγaγuluγsan tayijinar-un ür-e köbegüd-tür čöm üy-e ularin tasural ügei ijaγur-un olγaγuluγsan jerge-yi quriyanγuyilaju ayiladqaγad jalγamjilaγulqu yabudal-i qauli bolγaju tulγur oruju iregsen mongγolčud-un čirig-un γabiy-a-yi inu egüride ilerkeyiletügei, engke amuγulang on-ača inaγsi eng-ün jerge jidküged olγaγuluγsan tayijinar-un jerge-yi jalγamjilaγulqui-dur qariyatu yabudal-un yamun-ača mön-kü qauli yosuγar sidkeged, jarliγ-i γuyuju ayiladqaγad jalγamjilaγultuγai kemebei.