Mongolian Code 1695

nigen jüyil. aliba yaγum-a-yi iledte buliyabasu, vang-ud bolbasu jaγun aduγu, jasaγ-un noyad, qusiγun-u tayiji, güng-üd bolbasu dalan aduγu, tayiji-nar bolbasu tabin aduγu abumu. qaraču kümün bolbasu čabčiju alamu kemejüküi, yal-a-yin kündü könggen-i ilγaju ese toγtaγajuqui. tüsimel man-u kelelčegsen anu. qusiγu-yi jakiruγsan ba, ese jakiruγsan vang, noyad aliba yaγum-a-yi iledte buliyaqui-dur kümün-i [34a] alabasu, alaγsan kümün-i oru tölügüljü vang-ud bolbasu jaγun aduγu, noyad, qusiγun-u tayiji, güng-üd bolbasu dalan aduγu, tayiji tabunung-ud bolbasu tabin aduγu, kümün-i irtu üjügür ba modun sidam-iyar jančiju eremdeg bolbasu bey-e-yin qaγas ün-e qoyar yisü boda ögčü vang-ud bolbasu jaγun aduγu, noyan, qusiγun-u tayiji, güng bolbasu dalan aduγu, tayiji tabunung-ud bolbasu tabin aduγu, buliyaqui-dur, kümün-i [34b] alaγsan ügei qoor kigsen ügei bolbasu, vang-ud bolbasu jaγun aduγu, noyad, qusiγun-u tayiji, güng-üd bolbasu dalan aduγu, tayiji tabunung-ud bolbasu tabin aduγu abču jerge-yin kümün-dür öggüy-e tüsimel qaraču kümün nigen qoyar bolbasu, olan bülüglejü aliba yaγum-a-yi ilete buliyaqui-dur kümün-i alaqu ba qoor kibesü terigün ded-i lγal ügei čöm čabčiju alaγad em-e keüked ger mal-i keyiskejü, jerge-yin kümün-dür öggüye. [35a] tüsimel, qaraču kümün nigen qoyar bolbasu, olan bülüglejü, mal-un jerge-yin yaγum-a-yi qulaγuγsan-i mal-un ejen bolbasu, köndelen kümün bolbasu, medejü nekeküi-dür qulaγayiči kümün-i alaqu ba, qoor kikü bolbasu, terigün ded-i ilγal ügei čöm čabčiju alaγad, em-e keüked ger mal-i keyiskejü jerge-yin kümün-dür öggüy-e. tüsimel, qaraču kümün olan bülüglejü, aliba yaγum-a-yi ilete buliyaqui-dur, kümün-i ese alabasu, tulγur egüskegsen terigülegsen qoyar kümün-i köbčidejü alaγad em-e keüked ger mal-i keyiskejü busud-i ded bolγaju jaγuγad tasiγur jančiju γurbaγad yisün boda abču jergeyin kümün-dür [35b] öggüy-e. basa tüsimel bolbasu, qaraču kümün bolbasu, γaγča kümün bolbasu, jaγun tasiγur jančiju em-e keüked-eče öber-e ger mal-i keyiskejü, jerge-yin kümün-dür öggüy-e. qoyar γurban kümün bolbasu terigülegsen nigen kümün-i köbčidejü alaγad em-e keüked ger mal-i keyiskejü busud-i ded bolγaju jaγuγad tasiγur jančiju γurbaγad yisün-ü boda abču, jerge-yin kümün-dür öggüy-e. kemen kelelčejükui.