Mongolian Code 1695

nigen jüyil. vang-ud öber-ün öber-ün qariy-a-tu albatu ba, ger-ün boγul-yuγan irtü üjügür-tü mesen-iyer qadquju, čabčiju, alaqu ba, jorimaγ-iyar alaqu ba, ösiyelejü alaqu ba, soγtuγu-bar alaγsan bögesü, yala inu döčin aduγu, noyad, qusiγun-u tayiji, güng-üd bolbasu γučin aduγu, tayiji-nar bolbasu γurban yisün boda abqu alaγdaγsan kümün-ü törügsen aq-a degü-ner-tür inu öggüged, em-e keüked-i qamtubar qusiγun-u dotur-a duralaγsan γajar-tur ilegemü. basa jančiqui-dur endegdejü ükübesü ükügsen siltaγan-i bey-e-ber [37a] γarγaju kelebesü ösiy-e ügei bögesü γarγaqu ügei yala-yin mori kiged, boda-yi jasaγ-tur abumu. ejen inu boγul-yuγan alabasu, qusiγun-u ejen, meyiren-ü janggi-nar bolbasu, γurbaγad yisün boda, jalan-u janggi, sumun-u janggi-nar bolbasu qosiyaγad yisün boda, qaraču kümün bolbasu nijeged yisün boda abumu kemejüküi. qusiγunu ejen-eče doruγsi, qaraču kümün-eče degegsi, yalalqu-yi toγtaγaγsan-ača öber-e, alaγdaγsan kümün-ün em-e keüked-i kerkijü bolγaqu ba, basa tabunung-ud albatu ger-ün boγul-i alabasu, yalalaqu yabudal-i mön-kü ese toγtaγajuqui. tüsimel man-u kelelčegsen [37b] anu. tabunung-ud albatu ger-ün boγul-i alabasu, yalalaqu yabudal-i mön-kü tayijinar-un yosuγar bolγaya. qusiγun-u ejed-eče doruγsi, qaraču kümün-eče degegsi öber öber-ün ger-ün boγul-i irtü üjügür-ün mesen-ber qadquju, čabčiju, qarbuju alaqu ba, soγtuju alaqu kiged jorimaγ-iyar alaqu ba, ösiyelejü alaqu bolbasu qusiγun-u ejen, meyiren, jangginar bolbasu γurbaγad yisün boda, jalan-u janggi, sumun-u janggi, orulan kögegči-ner bolbasu, qosiyaγad yisün boda, qaraču kümün bolbasu, nijeged yisün boda abču, alaγdaγsan kümün-ü em-e keüked-dür ögčü aq-a-nar degüner-tei čöm qusiγim-u dotur-a γarγay-a. basa [38a] jančiqui-dur endegürejü ükükü ba, ükügsen siltaγan-i öber öber-ün jasaγ-un noyad-tur öglekü ba, ösiy-e siltaγan ügei bolbasu γarγaqu ügei, yal-a-yin mal-i jasaγ-tur abuy-a kemen kelelčejüküi.