Mongolian Code 1789

nigen jüil, jarliγ -iyar örüsiyen šangnaqu ba kesig kürtegekü ba basa öber-e kereg-tür ilegegsen sayid. kiy-a nar odbasu mön-kü jaq-a-yin ulus oduγsan sayid-un iregsen učir siltaγan-i asqaču, urida odču ögülegtün. vang, noyad yaγaran qariy-a-tu tüsimed-iyeren tabun-u γajar-un üjügür-e uγtuγulju. vang. noyad öber-ün küriyen-ečeγarču uγtuγad ger-tür kürügsen-ü qoyin-a örüsiyen šangnaqu ba kesig kürtegülküi-dür sögüdčü abuγad, emüskü qubčasun bolbasu emüsčü, degedü-yin jug qoyar üy-e sögüdčü, jirγuγan ta mörgümüi. ed tavar, idekü idegen bolbasu sögüdčü abuγad mön-kü qoyar üy-e sögüddüged jirγuγan ta mörgümüi. vang, noyad, oduγsan sayid qarilčan nijeged üy-e sögüdüged, nijeged üy-e mörgüged, mön-kü dumda jai talbiju, vang, noyad jegün eteged-tür, oduγsan sayid baraγun eteged-tür saγumui. oduγsan sayid-i üdeküi anu mön-kü uγtuγsan γajar-tur kürtel-e üdemüi γadaγadu vang, beyile, beyise, güng-üd kümün ilegejü aliba yayum-a kürgejü iregsen-dür deger-e-eče örüsiyen šangnaqu ba kesig soyurqaγad ilegebesü ger-tür kürügsen-ü qoyin-a vang, noyad ger-deče uγtün γaruγad küliyejü abuγad degedü-yin jüg qoyar üy-e sögüdčü, jirγuγan ta mördümüi. tegüeče öber-e jirγuγan yeke yabudal-un yamun-u odqu üyile kereg bolbasu kereg-ün učir siltaγan-i jarliγ-un bičig bičijü öber öber-ün yabudal-un yamun-u sayid-i ilegemüi. jaq-a-yin ulus oduγsan sayid-un ner-e, kereg-ün učir siltaγan-i asqaču. yaγaran öber öber-ün vang, noyad-taγan ögülegtün. vang, noyad sonusumaγča qariγ-a-tu tüsimed-iyen tabun-u γajar-un üjügür-e uγtuγul. uγtuγsan tüsimed morin-ača baγuju, baraγun eteged-tür jergečen joγsuγad, ilegegsen bičig-i önggeregüljü, qoyin-a-аčа mori-ban unuju güyičejü ireged, oduγsan sayid, jegün eteged-tür, uγtuγsan tüsimed baraγun eteged-tür jergečen bičig-i emün-e-ben yabuγal. ger-tür kürküi-dür vang, noyad gertečegen γarču uγtuγad, bitig ögküi-dür bey-e-ben böküyijü, qoyar γаr-iyar küliyen abču siregen-ü deger-e talbiγad, daγudaγsan-u qoyin-a vang noyad jegün eteged tür. oduγsan sayid baraγun eteged-tür saγumui.