Mongolian Code 1789

tngri-yin tedkügsen-ü döčin yisüdüger on. ebül-ün terigün sar-a-yin arban jirγuγan-a jarliγ baγulqaγsan anu. γadaγadu mongγol-un törü-yi jasaqu yabudal-un yamun-ača qan aγulan-u čiγulγan-u daruγ-a qalq-a-yin beyise sondubdorjinar-un medegülügsen yosuγar γal tüyimerdügsen-ü učir-tur jiγuqu tülegdegsen qamaγalaγči tüsimel bayar-tur dakiju jiγuqu sidkejü olγaγulqui-yi ayiladqaγsan ebkemel bičig-tür bayar orun γaruγsan-u qoyin-a basa nigen üy-e jalγamjilaγuluγtun, kemegsen qauli-yi esi tataju bičijüküi. bayar-un ečige basaidayin-dur abtaγsan-u učir-tur qamγalaγči tüsimel šangnaju tegün-ü köbegün bayar-tur jalγamjilaγulbai. ene tüsimel-i basa nigen üy-e jalγamjilaγad darui jalγamjilaqu üy-e baramui kemebčü, γaγčakü minu dotuγadu γajar-un qosiγun-u boγulud-un dotur-a urid dayin-dur abtaγsan-u učir tur šangnaγsan tüsimel-i jalγamjilaqu üy-e baraγad basakü tegün-ü ür-e-dür kesigtü tüsimel šangnaju üy-e ularin tasural ügei jalγamjilaγulqu qauli bui bögetel-e ene metü dayin-dur abtaγsan mongγol boγulud-tur šangnaγsan tüsimel-i jalγamjilaqu üy-e baraγsan-u qoyin-a kesigtü tüsimel šangnaju ese jalγamjilaγulbasu minu sedkil degen töbdekü ügei kesig kürtegejü bayar-un jalγamjilaγsan qamaγalaγči tüsimel darui dotuγadu γajar-un qauli yosuγar kesigtü tüsimel šangnaju, tegün-ü köbegüd ür-e degen üy-e ularin tasural ügei jalγamjilaγuluγtun. egün-i egüride qauli bolγ-a kemebei.