Mongolian Code 1789

nigen jüil, tüsimed ba qaraču kümün, vang, beyile, beyise güng, jiči basa eden-ü qatud-un kegür-i aγudalbasu terigülegsen nigen kümün-i darui deger-e čabčiju ala. em-e köbegüd ba ger, mal-i keyisgegtün. ded kümün-i jaγuγad tasiγurdaγad, γurbaγad yisü-ber torγaγad, jasaγ-iyar bolγaγsan qulaγayiči-yin em-e köbegüd ger, mal selte-yi kegür-ün ejen-dür ög. tayiji, tabunang-ud-un kegür-i aγudalbasu terigülegsen nigen kümün-i köbčidejü ala. gindan-dur qoriju küliy-e. ded kümün-i jaγuγad tasiγurdaγad, qusiyaγad yisü-ber torγaju kegür-ün ejen-dür ög. tüsimed-ün kegür-i aγudalbasu terigülegsen nigen kümün-i jaγun tasiγurdaγad yal-a-yin mal γurba yisü-ber torγ-a. busud-i jaγuγad tasiγurdaγad nijeged yisü-ber torγaju čöm kegür-ün ejen-dür ög, eng-ün kümün-ü kegür-i aγudalbasu terigülegsen nigen kümün-i jaγun tasiγurdaγad yal-a-yin mal nige yisü-ber torγ-a. busud-i nayaγad tasiγurdaγad, nijeged yisü-ber torγaju čöm kegür-ün ejen-dür ög. bumba bosqasuγai kemekü kümün bui bögesü bosγatuγai, öber-ün mongγol jang-iyar niγuju talbisuγai kemegčid bolbasu öber öber-ün ejen-ü joriγ-iyar boltuγai, ükügsen kümün-dür mori büü alaγtun. yodur büü qadquγtun. γool-un olum, dabaγan kötel-dür dalbaγ-a jalam-a büü elgügtün. čaγaja-ača dabaju yabuqui-yi ken medebesü medegsen kümün tabun mal ab.