Mongolian Code 1789

nigen jüil, aliba blam-a nar öber öber-ün ger-ün boγul ba busu kümün-ü kürgejü iregsen kümün-i küliyejü abuγad bandi bolγaqu ba basa dangsan ügei blam-a bandi-yi daruju aγuγulbasu jakirqu terigün blam-a-yi jakirqu tusiyal-ača inu bayilγaγad γurban yisün mal, gelüng, bandi nar-ača γurbaγad yisün mal torγaju abuγtun. dotuγadu kümün ger-ün kümün-i bandi bolγan blam-a-dur kürgekü ba ger-tür aγuγulqu kiged, dangsan-dur ügei joriγ-iyar yabuqu blam-a bandi-yi daruju aγuγulbasu, qariyatu qusiγu-yi jakiruγči sayid-ača doruγsi, baγ-a kögegči-eče degegsi, daruγsan kümün, gereči-yi qamtu-bar qariyatu yabudal-un yamun-dur tusiyan ögčü todurqayilan sigüged kündüde yalal-a. basa γadaγadu mongγol γajar-tur aγči dangsan-dur bičigsen blam-a nar-ača anggida joriγ-iyar demei yabuqu blam-a, bandi nar-i čöm kögegtün, kerber kögel ügei daruju aγuγulqu ba basa öber öber-ün albatu ger-ün boγul joriγ-iyar bandi bolγabasu köndülen kümün qariyatu albatu, ger-ün boγul gerečilebesü vang, beyile, beyise, güng, jasaγ-un tayijinar bolbasu nijeged jil fünglü tasul. fünglü ügei tayijinar bolbasu tabiγad mori ab. tüsimed bolbasu čöm tüsimel-i inu ebde. qaraču kümün bolbasu jaγun tasiγur janči, qariyatu jakiruγči vang, beyile, beyise, güng, tayijinar-i yisüged sar-a-yin fünglü tasul. qusiγu-yi jakiruγči janggi. meyiren-ü janggi, jalan-u janggi-yi nijeged yisün, sumun-u janggi, orulan kögegči-yi qusiyaγad yisü-ber torγaju mal abuγtun. baγ-a kögegči, arban ger-ün daruγ-a-yi jaγuγad tasiγurda. abuγsan yal-a-yin mal-i γurban qubi talbiju, nigen qubi-yi gereči-dür ög. albatu ba ger-ün köbüd, gerečilebesü öber-ün ejen-eče inu γаrγ-а. joriγ-iyar bandi bolγaγsan kümün joriγ-iyar saγuγsan blam-a, bandi-yi čöm sakil-i inu ebdejü ijaγur-un qusiγu, ijaγur-un ejen-dür gedergü ög. aru γajar daki čaqar-un naiman qusiγu, sürüg-ün arad-i mön ene yosuγar jerge-yi inu üjejü yalal-a.