Mongolian Code 1789

tngri-yin tedkügsen-ü qorin naimaduγar on-u ebül-ün dumdadu sar-a-dur jarliγ-i daγaju čirig-ün tuqai-yin sayid-ud sigükü yabudal-un yamun, γadaγadu mongγol-un törü-yi jasaqu yabudal-un yamun-u luγ-a neyilejü kelelčeged ayiladqaju toγtaγaγsan qauli

nigen jüil, tüsimel ba qaraču kümün aliba yaγum-a-yi iledte buliyaqui-daγan kümün-i alaγsan ügei nigen kümün bolbasu em-e köbegüd ger, baraγ-a, mal-i selte-ber qunan, šandung-dur čölegüljü örtegen-dür tusiyaju jobaqu alban-dur yabuγuluγtun. qoyar γurban kümün bolbaču olan bülüglejü qolaγubaču seddügsen nigen kümün-i köbčiden alaqu yal-a torγaγad gindan-dur qoriju küliy-e, ger, baraγ-a, mal-i keyisgejü jerge-yin kümün-dür ög. tegün-ü em-e köbegüd-i tür qariy-a-tu qusiγun-dur qadaγalaγul qoyin-a sigüküi-dür jerge-yi könggedkejü bey-e γarbasu, em-e köbegüd-i selte-ber qunan, šandung-dur čölegüljü örtegen-dür tusiyaju jobaqu alban-dur yabuγuluγtun ded qulaγayiči-yi em-e köbegüd ger, baraγ-a, mal-i selte-ber qunan, šandung-dur čölegüljü örtegen-dür tusiyaju jobaqu alban-dur yabuγuluγtun.